ਐਸ ਏ ਐਸ ਨਗਰ : ਗਊ ਗਰਾਸ ਸੇਵਾ ਸਮਿਤੀ ਵਲੋਂ ਪਹਿਲੀ ਰੋਟੀ ਗਾਂ ਲਈ ਮੁਹਿੰਮ ਤਹਿਤ ਸ਼ਾਸਤਰੀ ਮਾਡਲ ਸਕੂਲ, ਫੇਸ਼ 1, ਮੁਹਾਲੀ ਵਿੱਚ ਗਊ ਗਰਾਸ ਸੇਵਾ ਦੀ ਸ਼ੁਰੂਆਤ ਕੀਤੀ ਗਈ ਹੈ। ਇਸਦੇ ਤਹਿਤ ਸਮਿਤੀ ਵਲੋਂ ਸਕੂਲ ਦੇ ਅਹਾਤੇ ਵਿੱਚ ਇੱਕ ਗਊ ਗਰਾਸ ਬੈਂਕ ਸਥਾਪਿਤ ਕੀਤਾ ਗਿਆ, ਜਿਸ ਵਿੱਚ ਬੱਚੇ ਆਪਣੇ ਲੰਚ ਬਾਕਸ ਦੇ ਨਾਲ ਘਰ ਤੋਂ ਲਿਆਂਦੀ ਇੱਕ ਰੋਟੀ ਪਾਉਣਗੇ ਅਤੇ ਇਕੱਠੀਆਂ ਹੋਈਆਂ ਸਾਰੀਆਂ ਰੋਟੀਆਂ ਸਮਿਤੀ ਦੀ ਟੀਮ ਵਲੋਂ ਇਕੱਤਰ ਕਰਕੇ ਫੇਸ਼ 1 ਵਿਚਲੇ ਗਊ ਹਸਪਤਾਲ ਵਿੱਚ ਪਹੁੰਚਾ ਦਿੱਤੀਆਂ ਜਾਣਗੀਆਂ।
ਸਮਿਤੀ ਦੇ ਪ੍ਰਧਾਨ ਸ਼ੀਸ਼ਪਾਲ ਗਰਗ ਨੇ ਦੱਸਿਆ ਕਿ ਸਮਿਤੀ ਵਲੋਂ ਫੇਸ਼ 1 ਵਿਚਲੇ ਗਊ ਹਸਪਤਾਲ ਦੇ ਨੇੜਲੇ 10 ਸਕੂਲਾਂ ਨਾਲ ਸੰਪਰਕ ਕਰਕੇ ਗਉ ਗਰਾਸ ਬੈਂਕ ਸਥਾਪਤ ਕਰਨ ਦਾ ਟੀਚਾ ਮਿਥਿਆ ਗਿਆ ਹੈ। ਇਸ ਮੌਕੇ ਸਕੂਲ ਦੇ ਡਾਇਰੈਕਟਰ ਰਜਨੀਸ਼ ਸੇਵਕ ਨੇ ਦੱਸਿਆ ਕਿ ਗਾਂ ਲਈ ਇੱਕ ਰੋਟੀ ਲਿਆਉਣ ਨਾਲ ਬੱਚਿਆਂ ਵਿੱਚ ਦੇਣ ਦੀ ਭਾਵਨਾ ਵਿਕਸਿਤ ਹੋਵੇਗੀ ਅਤੇ ਉਹ ਸੰਸਕਾਰਿਤ ਬਣਨਗੇ।