ਭਾਜਪਾ ਆਗੂ ਦਾਮਨ ਬਾਜਵਾ ਨੇ ਮੰਤਰੀ ਅਮਨ ਅਰੋੜਾ ਨੂੰ ਕੀਤੇ ਸਵਾਲ

ਸੁਨਾਮ : ਭਾਜਪਾ ਜ਼ਿਲ੍ਹਾ ਸੰਗਰੂਰ -2 ਦੀ ਪ੍ਰਧਾਨ ਦਾਮਨ ਬਾਜਵਾ ਨੇ ਕੈਬਨਿਟ ਮੰਤਰੀ ਅਮਨ ਅਰੋੜਾ ਨੂੰ ਸਵਾਲ ਕਰਦਿਆਂ ਆਖਿਆ ਕਿ ਲੋਕਤੰਤਰ ਵਿੱਚ ਜਵਾਬਦੇਹੀ ਰਾਜਨੀਤੀ ਦਾ ਹਿੱਸਾ ਹੈ। ਵਿਰੋਧੀ ਧਿਰ ਦੇ ਆਗੂਆਂ ਦੁਆਰਾ ਪੁੱਛੇ ਜਾ ਰਹੇ ਸਵਾਲਾਂ ਦੇ ਜਵਾਬ ਸਰਕਾਰ ਦੇ ਨੁਮਾਇੰਦਿਆਂ ਨੂੰ ਦੇਣੇ ਪੈਣਗੇ, ਸਿਰਫ਼ ਗਾਲਾਂ ਕੱਢਣੀਆਂ ਕਹਿਕੇ ਨਹੀਂ ਬਚਿਆ ਜਾ ਸਕਦਾ। ਉਨ੍ਹਾਂ ਕਿਹਾ ਕਿ ਇਹ ਸਵਾਲ ਅਮਨ ਅਰੋੜਾ ਦੀ ਕੁਰਸੀ ਨੂੰ ਪੁੱਛੇ ਜਾ ਰਹੇ ਹਨ, ਜਿਸ ਕੁਰਸੀ ਤੇ ਉਹ ਬੈਠੇ ਹਨ ਇਹ ਸਵਾਲਾਂ ਦਾ ਜੁਆਬ ਅਮਨ ਅਰੋੜਾ ਨੂੰ ਦੇਣਾ ਪਵੇਗਾ, ਗਾਲਾਂ ਦੇ ਨਾਮ ਦਾ ਬਹਾਨਾ ਲਾ ਕੇ ਨਹੀਂ ਸਰਨਾ।  ਭਾਜਪਾ ਆਗੂ ਦਾਮਨ ਬਾਜਵਾ ਨੇ ਕਿਹਾ ਕਿ ਅਮਨ ਅਰੋੜਾ ਵੱਲੋਂ ਮੇਰੀਆਂ ਪੁਰਾਣੀਆਂ ਫੇਸਬੁੱਕ ਪੋਸਟਾਂ ਕੱਢਕੇ ਸਵਾਲ ਚੁੱਕਣ ਤੋਂ ਪਹਿਲਾਂ ਆਪਣੀਆਂ ਪੁਰਾਣੀਆਂ ਪੋਸਟਾਂ ਅਤੇ ਕੀਤੇ ਵਾਅਦਿਆਂ ਨੂੰ ਵੀ ਯਾਦ ਕਰ ਲੈਣਾ ਚਾਹੀਦਾ ਹੈ। ਨਵੀਂ ਅਨਾਜ ਮੰਡੀ ਦੇ ਡਰੇਨੇਜ ਸਿਸਟਮ ’ਤੇ ਅਮਨ ਅਰੋੜਾ ਆਪਣੇ ਸਾਢੇ ਚਾਰ ਸਾਲਾਂ ਦਾ ਹਿਸਾਬ ਦੇਣ ਕੀ ਕੀਤਾ ? ਬੁੱਧਵਾਰ ਦੇਰ ਸ਼ਾਮ ਸੁਨਾਮ ਵਿਖੇ ਆਪਣੀ ਰਿਹਾਇਸ਼ ਤੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦਾਮਨ ਬਾਜਵਾ ਨੇ ਨਵੀਂ ਅਨਾਜ ਮੰਡੀ, ਸੁਨਾਮ ਦੇ ਡਰੇਨੇਜ ਸਿਸਟਮ ਸਬੰਧੀ ਕਿਹਾ ਕਿ 2017 ਤੋਂ 2022 ਤੱਕ ਹਲਕਾ ਇੰਚਾਰਜ ਵਜੋਂ ਉਨ੍ਹਾਂ ਦਾ ਧਿਆਨ ਪਿਛਲੀਆਂ ਸਰਕਾਰਾਂ ਨੂੰ ਦੋਸ਼ ਦੇਣ ਦੀ ਬਜਾਏ ਸਮੱਸਿਆ ਦਾ ਹੱਲ ਕਰਨ ’ਤੇ ਰਿਹਾ। ਪਹਿਲਾਂ ਭਾਰੀ ਬਾਰਿਸ਼ ਤੋਂ ਬਾਅਦ ਨਵੀਂ ਅਨਾਜ ਮੰਡੀ ਵਿੱਚ 10–12 ਦਿਨ ਤੱਕ ਪਾਣੀ ਖੜ੍ਹਾ ਰਹਿੰਦਾ ਸੀ। ਜਾਖਲ ਰੋਡ ਵੱਲ ਡਰੇਨੇਜ ਸਿਸਟਮ ਜਾਮ ਹੋਣ, ਪਾਣੀ ਦੇ ਓਵਰਫਲੋ ਅਤੇ ਰੇਲਵੇ ਲਾਈਨ ਨੇੜੇ ਪੈਦਾ ਹੋਣ ਵਾਲੀਆਂ ਸਮੱਸਿਆਵਾਂ ਕਾਰਨ ਹਾਲਾਤ ਹੋਰ ਗੰਭੀਰ ਹੋ ਜਾਂਦੇ ਸਨ। ਉਨ੍ਹਾਂ ਕਿਹਾ ਕਿ ਇਸ ਸਮੱਸਿਆ ਦੇ ਹੱਲ ਲਈ ਉਨ੍ਹਾਂ ਵੱਲੋਂ ਨਵਾਂ ਪ੍ਰਬੰਧ ਕਰਵਾਇਆ ਗਿਆ, ਜਿਸ ਤਹਿਤ ਮੈਟਲ ਪਾਈਪਾਂ ਰਾਹੀਂ ਪਾਣੀ ਨੂੰ ਸਰਹਿੰਦ ਚੋਅ ਵੱਲ ਪੰਪ ਕਰਨ ਦਾ ਪ੍ਰਬੰਧ ਕੀਤਾ ਗਿਆ। ਮਿਊਂਸਪਲ ਸੀਵਰੇਜ ਲਾਈਨ ਨਾਲ ਪਾਈਪਲਾਈਨ ਦਾ ਕਨੈਕਸ਼ਨ, ਦੋ ਨਵੀਆਂ ਮੋਟਰਾਂ ਅਤੇ ਜਨਰੇਟਰਾਂ ਦਾ ਪ੍ਰਬੰਧ ਵੀ ਕਰਵਾਇਆ ਗਿਆ, ਤਾਂ ਜੋ ਬਿਜਲੀ ਸਪਲਾਈ ਪ੍ਰਭਾਵਿਤ ਹੋਣ ਦੇ ਬਾਵਜੂਦ ਪਾਣੀ ਦੀ ਨਿਕਾਸੀ ਜਾਰੀ ਰਹੇ। ਇਨ੍ਹਾਂ ਉਪਰਾਲਿਆਂ ਨਾਲ ਜਿੱਥੇ ਪਹਿਲਾਂ 10–12 ਦਿਨ ਪਾਣੀ ਖੜ੍ਹਾ ਰਹਿੰਦਾ ਸੀ, ਉੱਥੇ ਇਹ ਸਮਾਂ ਘਟ ਕੇ ਲਗਭਗ 1–2 ਦਿਨ ਰਹਿ ਗਿਆ। ਇਹ 100 ਫੀਸਦੀ ਹੱਲ ਨਹੀਂ ਸੀ। ਭਾਜਪਾ ਆਗੂਆਂ ਦਾਮਨ ਬਾਜਵਾ ਅਤੇ ਹਰਮਨਦੇਵ ਸਿੰਘ ਬਾਜਵਾ ਨੇ ਕਿਹਾ ਕਿ ਅਮਨ ਅਰੋੜਾ ਸੁਨਾਮ ਊਧਮ ਸਿੰਘ ਵਾਲਾ ਨੂੰ ਦਿੱਤੇ “ਡ੍ਰੀਮ ਪ੍ਰੋਜੈਕਟਾਂ” ਦਾ ਵੀ ਜਨਤਾ ਨੂੰ ਹਿਸਾਬ ਦਿਓ, ਬਠਿੰਡਾ ਰੋਡ ਸਰਹਿੰਦ ਚੋਅ ਵਾਲੇ ਵਾਕਿੰਗ ਟਰੈਕ ਦੀ ਹਾਲਤ ਵੀ ਉਨ੍ਹਾਂ ਨੂੰ ਖੁਦ ਦੇਖ ਲੈਣੀ ਚਾਹੀਦੀ ਹੈ। ਉਨ੍ਹਾਂ ਸ਼ਹਿਰ ਵਿੱਚ 49 ਲੱਖ ਰੁਪਏ ਦੀ ਲਾਗਤ ਨਾਲ ਰੱਖੇ ਗਮਲਿਆਂ ਦਾ ਹਿਸਾਬ ਵੀ ਸਰਕਾਰ ਦੇ ਨੁਮਾਇੰਦਿਆਂ ਤੋਂ ਮੰਗਿਆ ਹੈ।