ਬਰੇਟਾ : ਸਥਾਨਕ ਪੈਨਸ਼ਨਰਜ਼ ਵੈਲਫੇਅਰ ਐਸ਼ੋਸੀੇਏਸ਼ਨ ਦੀ ਮਹੀਨਾਵਾਰੀ ਮੀਟਿੰਗ ਸ਼੍ਰੀ ਦੁਰਗਾ ਮੰਦਿਰ ਧਰਮਸ਼ਾਲਾ ਵਿਖੇ ਪ੍ਰਧਾਨ ਮੇਲਾ ਸਿੰਘ ਮੰਡੇਰ, ਸਰਪਰਤ ਜਲਾਵਰ ਸਿੰਘ ਚਹਿਲ, ਕਾਰਜਕਾਰਨੀ ਮੈਂਬਰ ਰਾਜ ਕੁਮਾਰ ਦੀ ਪ੍ਰਧਾਨਗੀ ਵਿੱਚ ਹੋਈ। ਮੀਟਿੰਗ ਦੌਰਾਨ ਕਾਰਵਾਈ ਚਲਾਉਂਦਿਆਂ ਮੁੱਖ ਸਲਾਹਕਾਰ ਪ੍ਰਿੰਸੀਪਲ ਦਰਸ਼ਨ ਸਿੰਘ ਬਰੇਟਾ ਨੇ ਹਾਜ਼ਰ ਮੈਂਬਰਾਂ ਨੂੰ ਜੀਅ ਆਇਆ ਕਹਿੰਦਿਆਂ ਉਮਰ ਦੇ ਪਿਛਲੇ ਪਹਿਰੇ ਖੂਸ਼ ਰਹਿਣ ਦੇ ਮਨੋਵਿਗਿਆਨਕ ਨੁਕਤਿਆਂ ਤੇ ਤਫਸੀਲ ਨਾਲ ਸੰਵਾਦ ਰਚਾਇਆ। ਡਿਪ੍ਰੈਸ਼ਨ ਤੋਂ ਮੁਕਤੀ ਪਾਉਣ ਵਾਰੇ ਵੀ ਚਰਚਾ ਚੱਲੀ। ਘੁਮੱਕੜੀ ਦਾ ਸ਼ੌਂਕ ਰੱਖਣ ਵਾਲੇ ਗੁਰਦੀਪ ਸਿੰਘ ਮੰਡੇਰ ਨੇ ਵਡੇਰੀ ਉਮਰੇ ਘੁੰਮਣ ਘੁਮਾਉਣ ਰਾਹੀਂ ਆਨੰਦ ਲੈਣ ਅਤੇ ਲੰਬੇ ਸਫਰ ਨੂੰ ਸੌਖਾਲਾ ਬਨਾਉਣ ਦੇ ਤਜ਼ਰਬੇ ਸ਼ਾਂਝੇ ਕੀਤੇ। ਜੁਝਾਰੂ ਆਗੂ ਦਸੌਂਧਾ ਸਿੰਘ ਬਹਾਦਰਪੁਰ ਨੇ ਐਸ਼ੋਸੀਏਸ਼ਨ ਵਲੋਂ ਕਾਰਜਸ਼ੀਲ ਰਹਿ ਕੇ ਸਮਾਜ ਭਲਾਈ ਦੇ ਕਾਰਜ ਕਰਨ ਵਾਲੇ ਪ੍ਰੋਜੈਕਟ ਚਲਾਉਣ ਦੀ ਗੱਲ ਸੁਝਾਈ। ਐਸ਼ੋਸੀਏਸ਼ਨ ਦੀ ਸ਼ਾਨਾਮੱਤੀ ਪ੍ਰਥਾ ਮੁਤਾਬਕ ਫਰਵਰੀ ਮਹੀਨੇ ਜਨਮ ਦਿਨ ਵਾਲੇ ਸਾਥੀ ਸਰਦੁਲ ਸਿੰਘ ਚਹਿਲ, ਸ਼ਾਮ ਲਾਲ ਗਰਗ, ਮੈਡਮ ਹਰਿਕੇਸ਼ ਸ਼ਰਮਾਂ ਦਾ ਹਾਰ ਪਾ ਕੇ ਸਨਮਾਨ ਕਰਦਿਆਂ ਮੈਂਬਰਾਂ ਨੇ ਜਨਮ ਦਿਨ ਦੀਆਂ ਵਧਾਈਆਂ ਦਿੱਤੀਆਂ ਅਤੇ ਤੰਦਰੁਸਤੀ ਦੀ ਕਾਮਨਾ ਕੀਤੀ। ਸੱਤ ਪ੍ਰਕਾਸ਼ ਸ਼ਰਮਾਂ ਨੇ ਪਿਛਲੀਆਂ ਮੀਟਿੰਗਾਂ ਦੌਰਾਨ ਰਹੀਆਂ ਕਮੀਆਂ ਪੇਸ਼ੀਆਂ ਵੱਲ ਧਿਆਨ ਦਿਵਾਇਆ। ਮਿਲਖ ਰਾਜ ਸ਼ਰਮਾਂ ਅਤੇ ਸਰਦੁਲ ਚਹਿਲ ਨੇ ਗੀਤਾਂ ਨਾਲ ਮੀਟਿੰਗ ਦੇ ਮਹੌਲ ਨੂੰ ਖੁਸ਼ਗਵਾਰ ਬਣਾਈ ਰੱਖਿਆ। ਮੀਟਿੰਗ ਦੌਰਾਨ ਸਰਕਾਰ ਦੁਆਰਾ ਪੈਨਸ਼ਨਰਾਂ ਦਾ ਡੀ ਏ ਅਤੇ ਹੋਰ ਬਕਾਇਆਂ ਸੰਬੰਧੀ ਟਾਲਮਟੋਲ ਦੀ ਨੀਤੀ ਪ੍ਰਤੀ ਗੁੱਸਾ ਜਾਹਰ ਕਰਦਿਆਂ ਭਵਿੱਖ 'ਚ ਵੱਡੇ ਧਰਨੇ ਮੁਜਾਹਰੇ ਦੀ ਲਾਮਬੰਦੀ ਕਰਨ ਬਾਰੇ ਸਹਿਮਤੀ ਪ੍ਰਗਟਾਈ ਗਈ। ਸੀ ਐਮ ਓ ਦਫਤਰ ਮਾਨਸਾ ਵਲੋਂ ਅੱਖਾਂ ਦੀਆਂ ਬਿਮਾਰੀਆਂ ਬਾਰੇ ਪੈਂਡਿੰਗ ਬਿਲਾਂ ਨੂੰ ਅੱਖਾਂ ਦਾ ਡਾਕਟਰ ਨਾ ਹੋਣ ਦਾ ਬਹਾਨਾ ਬਣਾ ਕੇ ਲੰਬੇ ਸਮੇਂ ਤੋਂ ਕਾਰਵਾਈ ਨਾ ਕਰਨ ਦੀ ਪੁਰਜੋਰ ਨਿਖੇਧੀ ਕੀਤੀ ਗਈ। ਇਸ ਮਸਲੇ ਦੇ ਹੱਲ ਲਈ ਜਲਦੀ ਸੀ ਐਮ ਓ ਮਾਨਸਾ ਦਾ ਘਿਰਾਓ ਕਰਨ ਦਾ ਪ੍ਰੋਗਰਾਮ ਬਨਾਉਣ ਦੀ ਮੰਗ ਰੱਖੀ। ਸਰਕਾਰ ਵਲੋਂ ਪੈਨਸ਼ਨਰਾਂ ਨੂੰ ਆਨ ਲਾਈਨ ਕੇ ਵਾਈ ਸੀ ਜਾਂ ਲਾਈਫ ਸਰਟੀਫਿਕੇਟ ਸੰਬੰਧੀ ਭੇਜੇ ਜਾ ਰਹੇ ਮੈਸੇਜਾਂ ਦੇ ਭੰਬਲਭੁਸੇ ਨੂੰ ਦੂਰ ਕਰਨ ਸੰਬੰਧੀ ਵੀ ਸਰਕਾਰ ਨੂੰ ਅਪੀਲ ਕੀਤੀ ਗਈ। ਪੈਨਸ਼ਨਰਜ਼ ਭਵਨ ਦੀ ਥਾਂ ਸੰਬੰਧੀ ਵੀ ਵਿਚਾਰ ਚਰਚਾ ਕੀਤੀ ਗਈ। ਮੈਂਬਰਾਂ ਵਿੱਚ ਇਸ ਮਸਲੇ ਦਾ ਜਲਦੀ ਹੱਲ ਨਾ ਹੋਣ ਸੰਬੰਧੀ ਰੋਸ ਵੀ ਦੇਖਣ ਨੂੰ ਮਿਲਿਆ। ਮੀਟਿੰਗ ਨੂੰ ਜਰਨੈਲ ਸਿੰਘ ਬਰੇਟਾ, ਰਾਜਿੰਦਰ ਮਲੂਕਾ, ਰਘਵੀਰ ਗੁੱਡੂ, ਡਾ ਭਵਾਨੀ ਗਰਗ, ਅਸ਼ੋਕ ਸ਼ਰਮਾਂ, ਕ੍ਰਿਸ਼ਨ ਗੋਇਲ, ਰਾਜ ਕੁਮਾਰ, ਜਰਨੈਲ ਸਿੰਘ , ਲਾਲ ਸਿੰਘ, ਮੁਕੇਸ਼ ਕੁਮਾਰ, ਬਲਵੀਰ ਸਿੰਘ, ਕਰਮਜੀਤ ਸਿੰਘ, ਮਹਿੰਦਰ ਸਿੰਘ ਆਦਿ ਨੇ ਵੀ ਸੰਬੋਧਨ ਕੀਤਾ ਗਿਆ। ਕਾਰਜਕਾਰਨੀ ਮੈਂਬਰ ਖੇਮ ਚੰਦ ਨੇ ਭਰਵੀਂ ਸ਼ਮੁਲੀਅਤ ਕਰਕੇ ਮੀਟਿੰਗ ਨੂੰ ਕਾਮਯਾਬ ਕਰਨ ਲਈ ਸਾਰਿਆਂ ਦਾ ਧੰਨਵਾਦ ਕੀਤਾ ਗਿਆ।