ਜਲੰਧਰ : ਥਾਣਾ ਨੰ ਦੋ ਦੀ ਹੱਦ ਵਿਚ ਪੈਂਦੇ ਮੰਡ ਕੰਪਲੈਕਸ ’ਚ ਅੱਜ ਤੜਕੇ ਤਿੰਨ ਵਜੇ ਦੇ ਕਰੀਬ ਇਕ ਚੌਕੀਦਾਰ ਦਾ ਕਤਲ ਕਰ ਦਿਤਾ ਗਿਆ। ਜਿਸ ਵੇਲੇ ਚੌਕੀਦਾਰ ਦਾ ਕਤਲ ਕੀਤਾ ਗਿਆ ਉਸ ਵੇਲੇ ਉਹ ਅਪਣੇ ਇਕ ਸਾਥੀ ਨਾਲ ਮੰਡ ਕੰਪਲੈਕਸ ’ਚ ਪੈਂਦੀ ਇਕ ਦੁਕਾਨ ਦੇ ਬਾਹਰ ਸੁੱਤਾ ਹੋਇਆ ਸੀ ਜਿਥੋਂ ਉਸ ਨੂੰ ਉਠਾ ਕੇ ਲਿਜਾਇਆ ਗਿਆ ਤੇ ਉਸ ਦਾ ਬੇਰਹਿਮੀ ਨਾਲ ਕਤਲ ਕਰ ਦਿਤਾ ਗਿਆ। ਹਾਲਾਂਕਿ ਦੁਪਹਿਰ ਤਕ ਪੁਲਿਸ ਨੇ ਲਸੂੜੀ ਮੁਹੱਲੇ ਦੇ ਰਹਿਣ ਵਾਲੇ ਰਾਜੂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਕਤਲ ਦਾ ਕਾਰਨ ਇਕ ਮਹੀਨਾ ਪਹਿਲੇ ਹੋਏ ਕਾਲਾ ਅਤੇ ਰਾਜੂ ਦੇ ਵਿਚਾਲੇ ਹੋਏ ਵਿਵਾਦ ਨੂੰ ਦਸਿਆ ਜਾ ਰਿਹਾ ਹੈ ਜਿਸ ਵਿਚ ਰਾਜ਼ੀਨਾਮਾ ਹੋਣ ਦੇ ਬਾਵਜੂਦ ਵੀ ਰਾਜੂ ਨੇ ਅਪਣੇ ਮਨ ਵਿਚ ਖੁੰਦਕ ਪਾਲੀ ਹੋਈ ਸੀ ਜੋ ਕਤਲ ਦਾ ਕਾਰਨ ਬਣਿਆ।
ਜਾਣਕਾਰੀ ਅਨੁਸਾਰ ਰਜਿੰਦਰ ਉਰਫ਼ ਕਾਲਾ ਵਾਸੀ ਪਾਰਸ ਅਸਟੇਟ ਜੋ ਕਿ ਕਾਫੀ ਸਮੇਂ ਤੋਂ ਮੰਡ ਕੰਪਲੈਕਸ ’ਚ ਸਥਿਤ ਇਕ ਦੁਕਾਨ ਦੇ ਬਾਹਰ ਚੌਕੀਦਾਰੀ ਕਰਦਾ ਹੈ, ਕਲ ਰਾਤ ਅਪਣੇ ਸਾਥੀ ਨਾਲ ਸ਼ਰਾਬ ਪੀ ਕੇ ਦੁਕਾਨ ਦੇ ਬਾਹਰ ਸੌਂ ਗਿਆ। ਕੱੁਝ ਨੌਜਵਾਨ ਆਏ ਤੇ ਉਸ ਨੂੰ ਉਠਾ ਕੇ ਅਪਣੇ ਨਾਲ ਲੈ ਗਏ। ਅੱਗੇ ਜਾ ਕੇ ਉਸ ਦੇ ਸਿਰ ਵਿਚ ਇੰਟਰਲਾਕ ਟਾਇਲ ਤੇ ਲੱਕੜੀ ਦੇ ਦਸਤੇ ਨਾਲ ਹਮਲਾ ਕਰ ਕੇ ਉਸ ਦਾ ਕਤਲ ਕਰ ਦਿਤਾ। ਬਾਅਦ ’ਚ ਉਹ ਨੌਜਵਾਨ ਮੌਕੇ ਤੋਂ ਫ਼ਰਾਰ ਹੋ ਗਏ। ਘਟਨਾ ਦੀ ਸੂਚਨਾ ਮਿਲਦਿਆਂ ਹੀ ਏਸੀਪੀ ਸੈਂਟਰਲ ਬਰਜਿੰਦਰ ਸਿੰਘ ਥਾਣਾ ਦੋ ਦੇ ਮੁਖੀ ਇੰਸਪੈਕਟਰ ਸੁਖਵੀਰ ਸਿੰਘ ਪੁਲਿਸ ਪਾਰਟੀ ਸਮੇਤ ਮੌਕੇ ’ਤੇ ਪਹੁੰਚੇ ਅਤੇ ਜਾਂਚ ਸ਼ੁਰੂ ਕੀਤੀ। ਜਾਂਚ ਦੌਰਾਨ ਪੁਲਿਸ ਨੂੰ ਇਕ ਸੀਸੀਟੀਵੀ ਕੈਮਰੇ ਦੀ ਫ਼ੁਟੇਜ ਮਿਲ ਗਈ ਜਿਸ ਵਿਚ ਉਕਤ ਵਾਰਦਾਤ ਕੈਦ ਹੋਈ ਸੀ। ਇਸੇ ਦੇ ਆਧਾਰ ’ਤੇ ਪੁਲਿਸ ਨੇ ਮੁਲਜ਼ਮ ਨੂੰ ਕਾਬੂ ਕਰ ਲਿਆ।