ਚੰਡੀਗੜ੍ਹ : ਪੰਜਾਬ ਵਿਚ ਬਲੈਕ ਫ਼ੰਗਸ ਬੀਮਾਰੀ ਨੇ ਦਸਤਕ ਦੇ ਦਿਤੀ ਹੈ। ਲੁਧਿਆਣਾ ਵਿਚ 12 ਤੋਂ ਵੱਧ ਲੋਕ ਅੱਖਾਂ ਦੀ ਇਸ ਬੀਮਾਰੀ ਦੀ ਲਪੇਟ ਵਿਚ ਆ ਚੁੱਕੇ ਹਨ। ਇਸ ਵਿਚ ਬਹੁਤੇ ਪੀੜਤਾਂ ਦਾ ਇਲਾਜ ਦਯਾਨੰਦ ਮੈਡੀਕਲ ਕਾਲਜ ਵਿਚ ਚੱਲ ਰਿਹਾ ਹੈ। ਪੰਜ ਮਰੀਜ਼ ਅਜਿਹੇ ਹਨ ਜਿਨ੍ਹਾਂ ਦੇ ਦਿਮਾਗ਼ ਤਕ ਫ਼ੰਗਸ ਪਹੁੰਚ ਚੁੱਕੀ ਹੈ। ਲੁਧਿਆਣਾ ਦੇ ਡਾਕਟਰ ਰਮੇਸ਼ ਸੁਪਰ ਸਪੈਸ਼ਲਿਟੀ ਆਈ ਐਂਡ ਲੇਜ਼ਰ ਸੈਂਟਰ ਵਿਚ ਹਾਲੇ ਬਲੈਕ ਫ਼ੰਗਸ ਦਾ ਇਕ ਮਾਮਲਾ ਸਾਹਮਣੇ ਆਇਆ ਹੈ, ਮਰੀਜ਼ ਦੀ ਹਾਲਤ ਨੂੰ ਵੇਖਦੇ ਹੋਏ ਉਸ ਨੂੰ ਪੀਜੀਆਈ ਭੇਜ ਦਿਤਾ ਗਿਆ ਹੈ। ਡੀਐਮਸੀ ਦੇ ਈਐਨਟੀ ਵਿਭਾਗ ਦੇ ਹੈਡ ਡਾਕਟਰ ਮਨੀਸ਼ ਮੁੰਜਾਲ ਨੇ ਦਸਿਆ ਕਿ ਪਿਛਲੇ ਇਕ ਮਹੀਨੇ ਦੌਰਾਨ ਉਨ੍ਹਾਂ ਕੋਲ ਬਲੈਕ ਫ਼ੰਗਸ ਦੇ ਦਸ ਮਾਮਲੇ ਆ ਚੁੱਕੇ ਹਨ।