ਮੋਹਾਲੀ : ਸ਼ਹਿਰ ਦੇ ਉਭਰਦੇ ਲੇਖਕ ਅਮਰਜੀਤ ਸਿੰਘ ਧਨੋਆ ਦੀ ਲਿਖੀ ਪਹਿਲੀ ਕਿਤਾਬ ‘ਧੰਨਾ ਬਾਬਾ’ ਦੀ ਅੱਜ ਘੁੰਡ-ਚੁਕਾਈ ਕੀਤੀ ਗਈ। ਕੈਨਵਿਊ ਹੋਟਲ ਵਿਚ ਹੋਏ ਪ੍ਰਭਾਵਸ਼ਾਲੀ ਸਮਾਗਮ ਵਿਚ ਜੁੜੇ ਪਾਠਕਾਂ ਅਤੇ ਪਤਵੰਤਿਆਂ ਦੀ ਮਾਣਮੱਤੀ ਮੌਜੂਦਗੀ ਵਿਚ ਕਿਤਾਬ ਦਾ ਲੋਕ-ਅਰਪਣ ਕੀਤਾ ਗਿਆ। ਜ਼ਿਕਰਯੋਗ ਹੈ ਕਿ ਅਮਰਜੀਤ ਸਿੰਘ ਧਨੋਆ ਬਿਜਲੀ ਬੋਰਡ ਤੋਂ ਅਕਾਊਂਟਸ ਅਫ਼ਸਰ ਵਜੋਂ ਸੇਵਾਮੁਕਤ ਹੋਏ ਹਨ। ਉਹਨਾ ਆਪਣੇ ਪਿੰਡ ਰੁਪਾਲਹੇੜੀ ਵਿਚ ਰਹਿਦੇ ਬਚਪਨ ਦੌਰਾਨ ਜੋ ਵੀ ਮਹਿਸੂਸ ਕੀਤਾ ਉਹ ਉਹਨਾ ਦੀ ਕਿਤਾਬ ਦਾ ਸੂਤਰਧਾਰ ਹੋ ਨਿਬੜਿਆ। ਸਮਾਗਮ ਦੇ ਮੁੱਖ ਮਹਿਮਾਨ ਡੀ.ਐਸ.ਪੀ. ਹਰਸਿਮਰਨ ਸਿੰਘ ਬੱਲ ਨੇ ਕਿਤਾਬ ਰੀਲੀਜ਼ ਕਰਨ ਮਗਰੋਂ ਆਪਣੇ ਸੰਬੋਧਨ ਵਿਚ ਆਖਿਆ ਕਿ ਲੇਖਕ ਅਮਰਜੀਤ ਸਿੰਘ ਧਨੋਆ ਵਧਾਈ ਦੇ ਪਾਤਰ ਹਨ, ਜਿਨ੍ਹਾਂ ਨੇ ਅਪਣੀ ਪਹਿਲੀ ਹੀ ਕਿਤਾਬ ਵਿਚ ਕਮਾਲ ਦੀਆਂ ਲਿਖਤਾਂ ਲਿਖੀਆਂ ਹਨ। ਉਨ੍ਹਾਂ ਕਿਹਾ ਕਿ ਲੇਖਕ ਨੇ ਆਮ ਜ਼ਿੰਦਗੀ ਵਿਚ ਵਾਪਰਦੀਆਂ ਘਟਨਾਵਾਂ ਦਾ ਬਾਖ਼ੂਬੀ ਜ਼ਿਕਰ ਕੀਤਾ ਹੈ, ਜਿਹੜੀਆਂ ਅਕਸਰ ਹੀ ਸਾਡੇ ਧਿਆਨ ਤੋਂ ਅਣਗੌਲੀਆਂ ਰਹਿ ਜਾਂਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਕਿਤਾਬ ਦੀਆਂ ਤਮਾਮ ਲਿਖਤਾਂ ਵਿਚ ਬਾਬੇ ਨਾਨਕ ਦੇ ਸਿਧਾਂਤ ‘ਕਿਰਤ ਕਰੋ’ ਨੂੰ ਉੱਤਮ ਦਰਜਾ ਦਿਤਾ ਗਿਆ ਹੈ ਤੇ ਇਹੋ ਗੱਲ ਇਸ ਕਿਤਾਬ ਨੂੰ ਬਾਕੀ ਸਾਹਿਤਿਕ ਲਿਖਤਾਂ ਨਾਲੋਂ ਨਿਖੇੜਦੀ ਹੈ। ਇਸ ਮੌਕੇ ਆਪਣੇ ਸੰਬੋਧਨ ਵਿਚ ਸਾਬਕਾ ਕੌਂਸਲਰ ਅਤੇ ਪੰਜਾਬੀ ਵਿਰਸਾ ਸਭਿਆਚਾਰਕ ਅਤੇ ਵੈਲਫ਼ੇਅਰ ਸੁਸਾਇਟੀ ਦੇ ਪ੍ਰਧਾਨ ਸਤਵੀਰ ਸਿੰਘ ਧਨੋਆ ਨੇ ਆਖਿਆ ਕਿ ਲੇਖਕ ਨੇ ਅਪਣੇ ਬਚਪਨ ਵਿਚ ਜੋ ਕੁੱਝ ਵੇਖਿਆ ਅਤੇ ਹੰਢਾਇਆ, ਉਸ ਦਾ ਕਿਤਾਬ ਵਿਚ ਬਾਖ਼ੂਬੀ ਵਰਣਨ ਕੀਤਾ ਗਿਆ ਹੈ। ਉਨ੍ਹਾਂ ਦਸਿਆ ਕਿ ਲੇਖਕ ਨੇ ਅਪਣੇ ਪਿੰਡ ਰੁਪਾਲਹੇੜੀ ਵਿਚ ਗੁਆਂਢ ਵਿਚ ਰਹਿੰਦੇ ਬਜ਼ੁਰਗ ਦੀ ਪ੍ਰਭਾਵਸ਼ਾਲੀ ਸ਼ਖ਼ਸੀਅਤ ਤੋਂ ਪ੍ਰਭਾਵਤ ਹੋ ਕੇ ਇਹ ਕਿਤਾਬ ਲਿਖੀ ਹੈ। ਅਖ਼ੀਰ ਵਿਚ ਅਮਰਜੀਤ ਸਿੰਘ ਧਨੋਆ ਨੇ ਅਪਣੇ ਸੰਬੋਧਨ ਵਿਚ ਆਖਿਆ ਕਿ ਜੋ ਕੁੱਝ ਅਸੀਂ ਬਚਪਨ ਵਿਚ ਵੇਖਦੇ ਅਤੇ ਮਹਿਸੂਸਦੇ ਹਾਂ, ਉਹ ਸਾਰੀ ਉਮਰ ਸਾਡੇ ਨਾਲ-ਨਾਲ ਚਲਦਾ ਹੈ। ਉਨ੍ਹਾਂ ਕਿਹਾ, ‘ਮੈਂ ਬਚਪਨ ਤੋਂ ਹੀ ਹਰ ਘਟਨਾ ਪ੍ਰਤੀ ਸੰਵੇਦਸ਼ਨੀਲ ਹੁੰਦਾ ਸਾਂ। ਹਰ ਛੋਟੀ ਘਟਨਾ ਵੀ ਮੇਰੇ ਲਈ ਵੱਡੀ ਅਹਿਮੀਅਤ ਰੱਖਦੀ ਸੀ। ਭਾਵੇਂ ਸਾਡੇ ਗੁਆਂਢ ਦੇ ਬਜ਼ੁਰਗ ਦਾ ਸੁਭਾਅ ਅਤੇ ਕਾਰ-ਵਿਹਾਰ ਹੋਰਨਾਂ ਵਾਸਤੇ ਆਮ ਗੱਲ ਹੋਵੇਗੀ, ਪਰ ਮੈਂ ਉਸ ਨੂੰ ਬੜੇ ਹੀ ਧਿਆਨ ਨਾਲ ਵੇਖਦਾ ਤੇ ਵਿਚਾਰਦਾ ਸਾਂ। ਸੋ, ਚੇਤਿਆਂ ਵਿਚ ਵਸੀਆਂ ਉਨ੍ਹਾਂ ਹੀ ਯਾਦਾਂ ਨੂੰ ਮੈਂ ਕਿਤਾਬ ਦਾ ਰੂਪ ਦਿਤਾ ਹੈ, ਜਿਹੜੀ ਅੱਜ ਤੁਹਾਡੇ ਸਨਮੁੱਖ ਹੈ। ਉਮੀਦ ਕਰਦਾ ਹਾਂ ਕਿ ਆਪ ਮੇਰੀਆਂ ਲਿਖਤਾਂ ਨੂੰ ਮਾਣ ਬਖ਼ਸ਼ੋਗੇ।’ ਸਮਾਗਮ ਵਿਚ ਹਰਜਿੰਦਰ ਕੌਰ ਧਨੋਆ, ਕੌਸਲਰ ਕੁਲਦੀਪ ਕੌਰ ਧਨੋਆ, ਮਨਦੀਪ ਕੌਰ ਡਾਹਰੀ, ਹਰਵੰਤ ਸਿੰਘ ਗਰੇਵਾਲ,ਰਾਜਬੀਰ ਕੌਰ ਗਰੇਵਾਲ, ਭੁਪਿਦਰ ਸਿੰਘ ਡਾਹਰੀ, ਹਮਰਾਜ ਸਿੰਘ ਧਨੋਆ, ਗੁਰਲੀਨ ਕੌਰ ਧਨੋਆ ਡਾਇਰੈਕਟਰ ਘੈਂਟ ਪੰਜਾਬ,ਇੰਦਰਪਾਲ ਸਿੰਘ ਧਨੋਆ ਡਾਇਰੈਕਟਰ ਟਰਾਈਸਿਟੀ ਵੁਆਜਰਸ, ਨਵਕੀਰਤ ਕੌਰ ਧਨੋਆ, , ਹਰਸਦੀਪ ਸਿੰਘ ਸੇਰਗਿਲ, ਵਿਕਰਮਜੀਤ ਸਿੰਘ,ਜਸਵਿੰਦਰ ਸਿੰਘ, ਹਰਜਿੰਦਰ ਸਿੰਘ, ਹਰਦੀਪ ਸਿੰਘ ਧਨੋਆ,ਹਰਵਿੰਦਰ ਕੌਰ ਆਦਿ ਹਾਜ਼ਰ ਸਨ।