ਝਬਾਲ : ਕਸਬਾ ਝਬਾਲ ਵਿਖੇ ਅੰਮ੍ਰਿਤਸਰ ਰੋਡ ਤੇ ਸਥਿਤ ਸਟੇਟ ਬੈਂਕ ਆਫ ਇੰਡੀਆ ਝਬਾਲ ਬ੍ਰਾਂਚ ਚ,ਅੱਜ ਦਿਨ ਦਿਹਾੜੇ ਦੋ ਅਣਪਛਾਤੇ ਲੁਟੇਰਿਆਂ ਵੱਲੋਂ ਡਾਕਾ ਮਾਰ ਕੇ 8 ਲੱਖ ਰੁਪਏ ਲੁੱਟਣ ਦੇ ਨਾਲ ਨਾਲ ਗਾਰਡ ਦੀ ਰਫਲ ਲੈ ਕੇ ਫਰਾਰ ਹੋ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ ਹੈ।ਮੌਕੇ ਤੇ ਪੁੱਜੇ ਜਿਲਾ ਪੁਲੀਸ ਤਰਨਤਾਰਨ ਦੇ ਐਸ ਐਸ ਪੀ ਸ੍ਰੀ ਅਸਵਨੀ ਕਪੂਰ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਹੈਲਮੇਟ ਪਾਏ ਹੱਥ ਚ, ਪਿਸਤੌਲ ਫੜੇ ਦੋ ਨੌਜਵਾਨਾਂ ਨੇ ਬੈਂਕ ਦੇ ਅੰਦਰ ਦਾਖਲ ਹੁੰਦੇ ਹੀ ਗਾਰਡ ਦੀ ਰਫਲ ਖੋਹ ਲਈ ਅਤੇ ਬੈੰਕ ਮੁਲਾਜ਼ਮਾ ਨੂੰ ਹਥਿਆਰਾ ਦੀ ਨੋਕ ਤੇ ਰੱਖਦਿਆ ਕੈਸ ਕਾਊਂਟਰ ਤੇ ਜਿੰਨਾ ਕੈਸ ਸੀ ਉਸ ਨੂੰ ਬੈਗ ਵਿਚ ਪਾ ਕੇ ਗਾਰਡ ਦੀ ਰਫਲ ਵੀ ਨਾਲ ਲੈ ਕੇ ਬੁਲਟ ਮੋਟਰਸਾਈਕਲ ਤੇ ਫਰਾਰ ਹੋ ਗਏ।ਲੁੱਟ ਦੀ ਖਬਰ ਮਿਲਦਿਆ ਹੀ ਸਥਾਨਕ ਥਾਣਾ ਝਬਾਲ ਦੇ ਐਸ ਐਚ ਓ ਰਜਿੰਦਰ ਕੌਰ ਪੁਲੀਸ ਪਾਰਟੀ ਨਾਲ ਮੌਕੇ ਤੇ ਪਹੁੰਚੇ ਅਤੇ ਜਦ ਗਾਰਡ ਅਤੇ ਬੈੰਕ ਚ ਆਏ ਗਾਹਕ ਨੇ ਲੁਟੇਰਿਆਂ ਦਾ ਪਿੱਛਾ ਕੀਤਾ ਤਾਂ ਉਹ ਮੰਨਣ ਟੋਲ ਪਲਾਜਾ ਤੋ ਪਹਿਲਾ ਹੀ ਚਿੱਟੇ ਰੰਗ ਦੀ ਬਰੀਜਾ ਗੱਡੀ ਤੇ ਸਵਾਰ ਹੋ ਕੇ ਨਿਕਲ ਗਏ।ਉਨਾ ਕਿਹਾ ਕਿ ਸੀਸੀਟੀਵੀ ਕੈਮਰਿਆ ਨੂੰ ਖੰਘਾਲਿਆ ਜਾ ਰਿਹਾ ਹੈ।ਇਸ ਸਮੇਂ ਉਨਾ ਨਾਲ ਡੀਐਸਪੀ ਸਿਟੀ ਤਰਸੇਮ ਮਸੀਹ,ਡੀ ਐਸਪੀ ਭਿੱਖੀਵਿੰਡ ਪ੍ਰੀਤ ਇੰਦਰ ਸਿੰਘ,ਥਾਣਾ ਝਬਾਲ ਦੇ ਮੁਖੀ ਐਸ ਐਚ ਓ ਰਜਿੰਦਰ ਕੌਰ ਵੀ ਮੌਜੂਦ ਸਨ।